ភ្នំពេញ៖ រយៈពេល៩ខែ ឆ្នាំ២០២២ ចាប់ពីខែមករា ដល់ខែកញ្ញា ការអនុវត្តចំណូល ក្នុងប្រទេសសរុបថ្នាក់ជាតិ សម្រេចបាន ១៨ ៦៣៨ ប៊ីលានរៀលដែលស្មើនឹងប្រមាណ ៤៦០០លានដុល្លារ។តួលេខនេះ ស្មើនឹង៨៣.៧៩%នៃច្បាប់ហិរញ្ញវត្ថុ ឆ្នាំ២០២២ កើនឡើង២៤.៨១ % ។ នេះបើតាមរបាយការណ៍ របស់ក្រសួងសេដ្ឋកិច្ច និងហិរញ្ញវត្ថុ។
របាយការណ៍ដដែលនេះបានបញ្ជាក់ថា «ការអនុវត្តចំណូល ក្នុងប្រទេសសរុបថ្នាក់ជាតិ សម្រេចបាន ១៨ ៦៣៨ ប៊ីលានរៀល ស្មើនឹង ៨៣.៧៩% នៃច្បាប់ហិរញ្ញវត្ថុ ឆ្នាំ២០២២ កើនឡើង ២៤.៨១% ធៀបនឹងក្នុងរយៈពេលដូចគ្នាឆ្នាំ២០២១ដែលក្នុងនោះចំណូលសារពើពន្ធ កើនឡើង ២៥.៣១% និងចំណូលមិនមែនសារពើពន្ធកើនឡើង ២០.៩០%»។
បើតាមរបាយការណ៍ផ្អែកលើនិន្នាការនៃការអនុវត្តចំណូល ក្នុងរយៈពេលប៉ុន្មានឆ្នាំកន្លងមកនេះគួបផ្សំនឹងការងើបឡើងវិញនៃសកម្មភាព សង្គម-សេដ្ឋកិច្ចកម្ពុជា, ការប្រមូលចំណូលស្ថិតក្នុងគន្លង (on-track) ឈានទៅរកការសម្រេចបាន តាមផែនការគ្រោងទុក ក្នុងច្បាប់ហិរញ្ញវត្ថុ ឆ្នាំ២០២២៕ដោយៈសិរីមតី
