ភ្នំពេញៈ ផលិតផលដំឡូងមីប្រមាណជាង ២,៨ លានតោន ត្រូវបានកម្ពុជានាំចេញទៅលក់នៅទីផ្សារអន្តរជាតិនារយៈពេល ១០ ខែក្នុងឆ្នាំ ២០២២។ចំនួននេះ កើនឡើងជិត ៣៦ ភាគរយ បើធៀបរយៈពេលដូចគ្នាឆ្នាំ ២០២១ ។ នេះបើតាមក្រសួងកសិកម្ម រុក្ខាប្រមាញ់ និងនេសាទ។
ទិន្នន័យនាំចេញកសិផលរបស់ក្រសួងកសិកម្ម ដែលចេញផ្សាយថ្មីៗនេះបង្ហាញថា ចាប់ពីខែមករា ដល់ខែតុលា ឆ្នាំ ២០២២ កម្ពុជាបាននាំចេញផលិតផលពីដំឡូងមីទៅក្រៅប្រទេសសរុប ២ ៨៦៨ ៣៦២,៣៩ តោន កើន ៣៥,៦៧ ភាគរយ បើធៀបនឹងរយៈពេលដូចគ្នាឆ្នាំ ២០២១ ដែលមានចំនួន ២ ១១៤ ២៤០,៨៦តោន។
យោងតាមក្រសួងកសិកម្ម ផលិតផលដំឡូងមីនាំចេញត្រូវបានចែកចេញជា ៤ ប្រភេទ គឺទី១. ការនាំចំណិតដំឡូងមីក្រៀម នារយៈពេល ១០ ខែ ឆ្នាំ ២០២២ មានចំនួន ១ ៦៧០ ០៩០តោ ន ទី២. ដំឡូងមីស្រស់ មានចំនួន ១ ១២៩ ០០០ តោន ទី៣. ការនាំចេញម្សៅដំឡូងមី សម្រេចបាន ៥២ ០៩៣ តោន ទី៤ការនាំចេញកាកសំណល់ដំឡូងមី មានចំនួន ៩១៧៩,៣៩ តោន។
ទិន្នន័យក្រសួងកសិកម្មរុក្ខាប្រមាញ់ និងនេសាទឱ្យដឹងថា ក្នុងឆ្នាំ ២០២១ កម្ពុជាបាននាំចេញដំឡូងមីសរុប ២ ៧៩៣ ៧២៨,៩២ តាន ក្នុងនោះចំណិតដំឡូងមីក្រៀមចំនួន ១ ៦៤៤ ៥៩១,៦៨ តោន កើនឡើង ៨,៤៥ ភាគរយ, ដំឡូងមីស្រស់ ១ ១០៤ ២២០ តោន កើនឡើង ៥២,៦ ភាគរយ, ម្សៅដំឡូងមី ៣៥ ៨៦២,៧៤ តោន កើនឡើង ២,៦៦ ភាគរយ និងកាកសំណល់ដំឡូងមី ៩ ០៥៤,៥០ តោន ថយចុះ ៣៣,០៦ ភាគរយ៕ដោយៈសុផល
