នៅពេលដែលខ្សែប្រយុទ្ធសញ្ជាតិបារាំង Karim Benzema ត្រូវបានផ្ដល់ដំណឹងពីកាតព្វកិច្ច នៅព្រឹត្តិការណ៍ World Cup មិត្តរួមក្រុម Real Madrid របស់គេ ក្នុងនោះមានទាំងកីឡាករ Eder Militao របស់ក្រុមជម្រើសជាតិប្រេស៊ីលផងដែរ បានគិតថា រូបគេមិនមានបញ្ហាអ្វីទេ ប៉ុន្តែចុងក្រោយ កីឡាករវ័យ ៣៤ឆ្នាំ ត្រូវបានដកឈ្មោះចេញពីកម្មវិធីប្រកួតប្រជែងដ៏ធំនេះ បន្ទាប់ពីរងរបួស ក្នុងពេលហ្វឹកហាត់ កាលពីថ្ងៃសៅរ៍។
នៅពេលត្រូវបានសួរអំពីស្ថានភាពរបស់កីឡាករ Benzema ក្នុងរយៈពេលប៉ុន្មានសប្តាហ៍ចុងក្រោយនេះ ក្រោយរូបគេបានខកខានការប្រកួត ៩លើក ក្នុងចំណោម ១៥ហ្គេមចុងក្រោយរបស់ក្រុម Real ដោយសារអ្វី ដែលក្លិបប្រាប់ថា ភ្លៅមិនមានកម្លាំងគ្រប់គ្រាន់នោះ កីឡាករ Militao បាននិយាយថា មិតរួមក្រុមរបស់ខ្លួន ប្រឹងតស៊ូជាមួយបញ្ហារបួស ដើម្បីបានជាសះស្បើយទាន់ពេល សម្រាប់ World Cup។
កីឡាករ Militao បានប្រាប់អ្នកសារព័ត៌មាន មុនការប្រកួតបើកឆាក World Cup របស់ប្រេស៊ីលទល់នឹងក្រុមស៊ែប៊ី នៅថ្ងៃព្រហស្បតិ៍ថា៖ «រូបគេ (Benzema) កំពុងផ្អាក (មិនលេង) ការប្រកួតរបស់ក្លិប តាមដែលអាចធ្វើបាន ព្រោះរូបគេមានអារម្មណ៍មូលល្អ ប៉ុន្តែនៅពេលរូបគេទទួលដំណឹង (សម្រាប់ប្រទេសបារាំង) យើងគិតថា អ្វីៗគ្រប់យ៉ាងគឺល្អ»។
«ខ្ញុំមិនបាននិយាយជាមួយគេទេ ប៉ុន្តែ Vinicius Jr (ខ្សែប្រយុទ្ធប្រេស៊ីលរបស់ក្រុម Real) បាននិយាយ ដោយប្រាប់ថា គេ (Benzema) មានអារម្មណ៍មិនជាស្រួលនោះឡើយ។ ខ្ញុំសូមជូនពររូបគេល្អប្រសើរឡើងវិញ និងជាសះស្បើយឱ្យបានឆាប់»។ កីឡាករ Militao បានបន្ថែម។
កីឡាករ Benzema ដែលជាម្ចាស់ជយលាភីពានរង្វាន់ Ballon d’Or បានចាកចេញទាំងបង្ខំចិត្តពីការហ្វឹកហាត់របស់ក្រុមការពារជើងឯកបារាំង កាលពីថ្ងៃសៅរ៍។ ការតស៊ូជាមួយរបួសរបស់រូបគេ បានចាប់ផ្តើមតាំងពីថ្ងៃទី៦ ខែកញ្ញា អំឡុងការប្រកួត នៅក្របខ័ណ្ឌ Champions League ទល់នឹងក្រុម Celtic នៅពេលដែលគាត់ត្រូវប្តូរចេញយ៉ាងឆាប់ នៅវគ្គទី១ ហើយបន្ទាប់មកខកខានការប្រកួត ៣លើកបន្ទាប់របស់ក្រុម Real៕