ភ្នំពេញ៖ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយក្រុមហ៊ុន អេមរ៉ូរាយ ថ្ងៃទី១៩ ខែវិច្ឆិកា ឆ្នាំ២០២២បានចុះទៅជូបពិភាក្សាផ្ទាល់ជាមួយបងប្អូនប្រជាកសិករ នៅតំបន់ឆ្ងាយៗពីទីតាំងប្រមូលផ្តុំ ដែលកំពង់ជួយអន្តរាគមន៍ដោយក្រុមហ៊ុន បៃតង របស់លោក ឧកញ៉ា ភូ ពុយ អគ្គនាយក្រុមហ៊ុន បៃតងកម្ពុជា និងធនាគាស្រូវ និងសមាជិកសហព័ន្ធស្រូវអង្ករកម្ពុជា ដែលនៅទីតាំងក្នុងខេត្តនបាត់ដំបង និងបន្ទាយមានជ័យ។
ដើម្បីជួយសម្រួលតម្លៃស្រូវកុំឱ្យទាបជាង ១០៣៥ រៀល ក្នុងមួយគីឡូក្រាមសម្រាប់ស្រូវគុណភាពលេខ១ ប្រភេទផ្ការំដួល ឧកញ៉ាប្រធានសហព័ន្ធស្រូវអង្ករកម្ពុជបានលើកឡើងថាក្រោម ការជួយជ្រោមជ្រែងពីរាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដែលមានធនាគារអភិវឌ្ឍន៍ជនបទ និងកសិកម្ម ជាសេនាធិការក្នុងការជួយផ្តល់ឥណទាន ការជួយសម្របសម្រួល ពីក្រសួងកសិកម្ម រុក្ខាប្រម៉ាញ់និង នេសាទ ក្រសួងពាណិជ្ជកម្ម អាជ្ញាធរដែនដីនោះ រោងម៉ាស៊ីនកិនស្រូវទាំងអស់បានខិតខំប្រមូលទិញស្រូវឱ្យអស់លទ្ធភាព។
ដោយឡែកអភិបាលខេត្តបន្ទាយមានជ័យ លោក អ៊ុំ រាត្រីដែលបានចុះជួបផ្ទាល់ជាមួយក្រុមឈ្មួញ និងប្រជាកសិករនៅកន្លែងប្រមូលទិញស្រូវ ក្នុងឃុំស្វាយចេក ស្រុកស្វាយចេក ខេត្តបន្ទាយមានជ័យកាលពីចុងសប្តាហ៍មុន បានចេញគោលការណ៍ឲ្យការទិញស្រូវ ដូចនឹងតម្លៃដែលក្រុមឈ្មួញទិញនៅខេត្តបាត់ដំបង ពោលមួយគីឡូក្រាមមិនក្រោម ១០៤០រៀលនោះឡើយ សម្រាប់ស្រូវផ្ការំដួលប្រភេទ លេខ១។
លោក អ៊ុំ រាត្រី បានថ្លែងថា នៅក្នុងខេត្តបន្ទាយមានជ័យ ស្រូវដែលប្រជាកសិករកំពុងប្រមូលផលនេះមានប្រមាណ ១០ម៉ឺនហិកតា ដែលមកដល់ពេលនេះប្រមូលអស់ប្រមាណ ២ម៉ឺនហិកតាហើយ នៅសល់ ៧ទៅ៨ម៉ឺនហិកតាទៀត៕ដោយៈសិរីមតី
