លោក Luis Enrique ជឿជាក់ថា វានឹងជារឿង «អយុត្តិធម៌» សម្រាប់កីឡាករ Lionel Messi ក្នុងការបញ្ចប់អាជីពដ៏ភ្លឺស្វាងរបស់ខ្លួន ដោយមិនធ្លាប់បានឈ្នះពានរង្វាន់ពីព្រឹត្តិការណ៍ World Cup ហើយលោកចង់ឱ្យក្រុមជម្រើសជាតិអាហ្សង់ទីនឈ្នះជើងឯក នៅប្រទេសកាតា ប្រសិនបើក្រុមអេស្ប៉ាញរបស់លោក មិនជោគជ័យនោះទេ។
ខ្សែប្រយុទ្ធឆ្នើម Messi នឹងចាប់ផ្តើមយុទ្ធនាការ នៅ World Cup ជាលើកទី៥ របស់ខ្លួន នៅពេលដែលក្រុមអាហ្សង់ទីន ត្រូវជួបជាមួយក្រុមអារ៉ាប៊ីសាអូឌីត នៅថ្ងៃអង្គារ ដោយការរងបរាជ័យ ក្នុងវគ្គផ្ដាច់ព្រ័ត្ររបស់ក្រុមពពកស កាលពីឆ្នាំ២០១៤ នោះ ជាឱកាសដ៏កៀកបំផុត ដែលរូបគេ ត្រូវបានកាន់ពានរង្វាន់ដ៏ធំនេះ ក្នុងដៃ។
បើទោះបីជាស៊ុតបញ្ចូលទីបាន ៦គ្រាប់ នៅ World Cup (៤គ្រាប់ ក្នុងឆ្នាំ២០១៤) ក៏ដោយ ក៏កីឡាករ Messi មិនអាចទម្លុះសំណាញ់ទីបាន ក្នុងរយៈពេល ៧៥៦នាទីនៃការប្រកួត ក្នុងវគ្គចាញ់ធ្លាក់ នាពេលនោះដែរ។
តែកីឡាករ Messi មកចូលរួមក្នុងព្រឹត្តិការណ៍នេះ ជាមួយនឹងការមានទម្រង់លេងដ៏ល្អ បន្ទាប់ពីសម្របខ្លួនមួយរយៈ នៅឯក្រុម Paris Saint-Germain ហើយប្រសិនបើលោក Enrique មិនអាចដឹកនាំអេស្ប៉ាញឱ្យទទួលបានភាពរុងរឿង នៅកាតានេះទេ គាត់សង្ឃឹមថា អតីតខ្សែប្រយុទ្ធ នៅក្លិប Barcelona របស់គាត់រូបនេះ នឹងទទួលជ័យជម្នះ។
លោក Enrique បាននិយាយនៅលើឆាណែល Twitch របស់គាត់ កាលពីថ្ងៃសុក្រថា៖ «ប្រសិនបើអេស្ប៉ាញមិនឈ្នះពាន World Cup សុំឱ្យអាហ្សង់ទីនជាអ្នកសម្រេចបានទៅចុះ។ វានឹងជារឿងអយុត្តិធម៌ សម្រាប់ Messi ក្នុងការចូលនិវត្តន៍ ដោយមិនមានឈ្នះពាន World Cup នោះទេ»។
នៅពេលត្រូវបានសួរថា តើក្រុមណា ដែលគាត់គិតថា នឹងក្លាយជាគូប្រជែងដ៏ធំ សម្រាប់ការប្រកួតប្រជែងនេះ លោក Enrique បានបន្ថែមថា៖ «ក្រុមប្រេស៊ីល និងអាហ្សង់ទីន គឺជាជម្រើស ដែលមនុស្សគ្រប់គ្នាមាន នៅក្នុងចិត្តរួចហើយ ហើយពិតណាស់ ក៏មានក្រុមបារាំង និងអាល្លឺម៉ង់។ ដូចគ្នាដែរ អេស្ប៉ាញ និងហូឡង់ ជាក្រុមមិនអាចមើលរំលងបាន»។
លោក Enrique បានបង្ហាញខ្លួនចំនួន ១២លើក ក្នុងនាមជាកីឡាកររបស់ក្រុមគោជល់អេស្ប៉ាញ ដោយបានឆ្លងកាត់យុទ្ធនាការ World Cup ចំនួន ៣ដង ក្នុងឆ្នាំ១៩៩៤, ឆ្នាំ១៩៩៨ និងឆ្នាំ២០០២ ក្នុងនោះរូបលោកស៊ុតបញ្ចូលទីបាន ២គ្រាប់៕