អ្នកគាំទ្របាល់ទាត់ ដែលចូលរួមមើលការប្រកួតបាល់ទាត់ ក្នុងព្រឹត្តិការណ៍ World Cup 2022 នៅប្រទេសកាតា នឹងចំណាយជិត ៤០ភាគរយបន្ថែមទៀត សម្រាប់តម្លៃសំបុត្រ បើធៀបនឹងអ្នកដែលបានទស្សនាការប្រកួតនេះ ក្នុងឆ្នាំ២០១៨ នៅប្រទេសរុស្ស៊ី ដោយតម្លៃសំបុត្រ សម្រាប់វគ្គផ្តាច់ព្រ័ត្រ ថ្លៃ ៦៨៤ផោន (៨១២ដុល្លារអាមេរិក) ជាមធ្យម។ នេះបើយោងតាមការសិក្សាមួយ។
ការសិក្សារបស់ក្រុមហ៊ុនសំលៀកបំពាក់កីឡា Keller Sports ដែលមានមូលដ្ឋាន នៅទីក្រុង Munich ប្រទេសអាល្លឺម៉ង់ បានបង្ហាញថា ខណៈអ្នកគាំទ្រនៅប្រទេសរុស្ស៊ី បានចំណាយជាមធ្យម ២១៤ផោន សម្រាប់កៅអីមួយ សំបុត្រការប្រកួត នៅកាតា មានតម្លៃជាមធ្យម ២៨៦ផោន ដូច្នេះ តម្លៃសំបុត្រ នៅប្រទេសកាតា គឺថ្លៃបំផុតមិនធ្លាប់មាន សម្រាប់ការប្រកួត World Cup ក្នុងរយៈពេល ២០ឆ្នាំចុងក្រោយនេះ ដោយតម្លៃសំបុត្រ សម្រាប់ការប្រកួតវគ្គផ្តាច់ព្រ័ត្រថ្លៃជាង ៥៩ភាគរយ កាលពី ៤ឆ្នាំមុន។
របាយការណ៍នៃការសិក្សានោះ បានឱ្យដឹងថា៖ «ព្រឹត្តិការណ៍ World Cup នៅប្រទេសកាតា ត្រូវបានចាត់ទុកថា ជាការប្រកួតបាល់ទាត់ពិភពលោក ដែលមានតម្លៃថ្លៃបំផុតមិនធ្លាប់មាន។ ការសាងសង់កីឡដ្ឋានថ្មីចំនួន ៦ និងការជួសជុលទាំងស្រុងឡើងវិញនៃកីឡដ្ឋានចំនួន ២ផ្សេងទៀត នៅប្រទេសនេះ ត្រូវបានគេដឹងថា ចំណាយអស់ប្រហែល ៣ពាន់លានដុល្លារ»។
«លុយកាន់តែច្រើន ត្រូវបានចំណាយលើការពង្រីកហេដ្ឋារចនាសម្ព័ន្ធនៃរដ្ឋធានីដូហា ដូចជាផ្លូវដឹកជញ្ជូន និងការកែលម្អព្រលានយន្តហោះអន្តរជាតិឡើងវិញ។ វាមិនមែនជារឿងគួរឱ្យផ្អើលទេ ដែលព្រឹត្តិការណ៍ World Cup នៅកាតា ក៏ជា World Cup ដែលមានតម្លៃសំបុត្រថ្លៃបំផុតជាមធ្យមនោះ»។ របាយការណ៍បានបន្ថែម។
ស្ថាប័នគ្រប់គ្រងបាល់ទាត់អន្តរជាតិ (FIFA) មិនបានឆ្លើយតបភ្លាមៗ ចំពោះសំណើសុំអធិប្បាយនោះទេ។ FIFA នៅមុននេះ បានឱ្យដឹងថា សំបុត្រជិត ៣លានសន្លឹក នៅទូទាំងកីឡដ្ឋានទាំង៨ ក្នុងប្រទេសកាតា ត្រូវបានលក់អស់ មុនការប្រកួតបាល់ទាត់ពិភពលោក ពីថ្ងៃទី២០ ខែវិច្ឆិកា ដល់ថ្ងៃទី១៨ ខែធ្នូ ដែលជាការប្រារព្ធលើកដំបូង នៅមជ្ឈិមបូព៌ា។
សំបុត្រ សម្រាប់ World Cup ក្នុងឆ្នាំ២០០៦ នៅប្រទេសអាល្លឺម៉ង់ ត្រូវបានចាត់ទុកថា មានតម្លៃសមរម្យបំផុត ក្នុងរយៈពេល ២០ឆ្នាំចុងក្រោយនេះ ដោយតម្លៃជាមធ្យម ១០០ផោនសម្រាប់ការប្រកួត ខណៈដែលសំបុត្រ ក្នុងវគ្គផ្តាច់ព្រ័ត្រ នៅឯពហុកីឡដ្ឋានអូឡាំពិក ក្នុងទីក្រុងប៊ែរឡាំង មានតម្លៃជាមធ្យម ២២១ផោន ក្នុង ១កៅអី៕