ព្រៃវែង៖ប្រជាពលរដ្ឋបាននាំគ្នាចាប់បុរសម្នាក់យកឱ្យនគរបាល បន្ទាប់ពីរូបគេប្រើពូថៅ កាប់លើតាអាចារ្យធំវត្តឥន្ទចក្រី ហៅវត្តស្រឡូង បណ្តាលឱ្យផុងលលាដ៍ក្បាលស្លាប់ភ្លាម។
អ្នកភូមិបានឱ្យដឹងថា តាអាចារ្យវត្តស្រឡូង ត្រូវបានបុរសម្នាក់យកពូថៅកាប់ឱ្យផុងលលាដ៍ ក្បាលបណ្តាលឱ្យស្លាប់ភ្លាមដោយមិនទាន់ដឹងពីមូលហេតុច្បាស់លាស់។អំពើឃាតកម្មនោះនៅវត្តស្រឡូង ភូមិស្រឡូងទី២ ឃុំអង្គរទ្រេត ស្រុកស្វាយអន្ទរ ខេត្តព្រៃវែង កាលពីយប់ថ្ងៃទី៩ ខែវិច្ឆិកា ឆ្នាំ២០២២។
ជនរងគ្រោះឈ្មោះអ៊ុំ អ៊ីន អាយុ៨៥ឆ្នាំ ជាអាចារ្យធំវត្តស្រឡូង ទីកំណើតភូមិចារ ឃុំរំលេច ស្រុកស៊ីធរកណ្តាល ខេត្តព្រៃវែង សព្វថ្ងៃរស់នៅភូមិឃុំខាងលើ។ចំណែកជនសង្ស័យ ត្រូវបានប្រជាពលរដ្ឋនាំគ្នាចាប់ខ្លួនប្រគល់ឱ្យនគរបាលប៉ុស្តិ៍ឈ្មោះ អ៊ុំ ចាក់ អាយុ៥៣ឆ្នាំ រស់នៅភូមិ ឃុំកើតហេតុ។ក្រោយឃាត់ខ្លួនបុរសដៃដល់រួចមក សមត្ថកិច្ចបានកសាងសំណុំរឿង បញ្ជូនបន្តតាមនីតិវិធី៕ដោយ៖វិចិត្រ