ភ្នំពេញ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នឹងចុះហត្ថលេខជាមួយអគ្គរដ្ឋបាលគយប្រទេសចិន ដើម្បីបើកផ្លូវនាំចេញ ម្រេច ត្រីធម្មជាតិ និងជលផលរស់ ពីកម្ពុជាចូលទៅកាន់ទីផ្សារប្រទេសចិន។នេះបើតាមលោក ហ៊ាន វណ្ណហន រដ្ឋលេខា ធិការក្រសួងកសិកម្ម រុក្ខាប្រមាញ់ និងនេសាទ។
លោក ហ៊ាន វណ្ណហន បានឱ្យដឹងថា៖កិច្ចព្រមព្រៀងនេះនឹងចុះហត្ថលេខាក្នុងខែវិច្ឆិកា ឆ្នាំ២០២២ បន្ទាប់ពីទទួលបានសិទ្ធិប្រទាន។ កម្ពុជាត្រូវគោរពតាមលក្ខខណ្ឌភូតគាមអនាម័យ ក្នុងការនាំចេញ ម្រេច ត្រីធម្មជាតិ និងជលផលរស់ ទៅកាន់ទីផ្សារប្រទេសចិន។
លោកបានឱ្យដឹងទៀតថា៖ក្រៅពីកិច្ចព្រមព្រៀងខាងលើ លោករដ្ឋមន្ត្រី ឌិត ទីណា នឹងចុះហត្ថលេខាចំនួន២បន្ថែមទៀត ជាមួយក្រសួងកសិកម្ម និងការងារជនបទចិន ដើម្បីទទួលជំនួយវ៉ាក់សាំងសត្វ។ លើសពីនេះ ក៏មានកិច្ចសហប្រតិបត្តិការលើការងារបសុឧសថ បសុជីវសាស្ត្រ និងអាហាបន្ថែមសម្រាប់សត្វផងដែរ។
គួរបញ្ជាក់ផងដែរថា កន្លងមក កម្ពុជា ក៏ធ្លាប់បាននាំចេញផលិតផលកសិកម្មចំនួន ៣៥មុខទៅកាន់ទីផ្សារចិន ខណៈមៀនប៉ៃលិន នឹងត្រូវនាំចេញទៅចិន ក្នុងពេលឆាប់ៗខាងមុខ៕ ដោយៈសិរីមតី