ទីភ្នាក់ងារវិទ្យាសាស្រ្តណាសាអាម៉េរិកបាននិយាយនៅសប្តាហ៍នេះថា ខ្លួនគឺជាអ្នកស្រោចស្រង់ពិភពលោកពិតប្រាកដ ខណៈបានបញ្ចៀសអាចម៍ផ្កាយយក្សដោយជោគជ័យមិនឲ្យបុកផែនដី។
ប្រធានអង្គការ NASA លោក Bill Nelso បាននិយាយកាលពីថ្ងៃអង្គារ ទី១១ ខែតុលាថា ទីបំផុតឧបករណ៍ដ៏មានឥទ្ធិពល ឬយានបុកអាចម៍ផ្កាយ Double Asteroid Redirection Test ហៅកាត់ថា (DART) ទំហំប៉ុនទូទឹកកក បានបុកជាមួយអាចម៍ផ្កាយ Dimorphos ដោយជោគជ័យកាលពីថ្ងៃទី២៦ ខែកញ្ញា ដោយបានរុញអាចម៍ផ្កាយនោះចេញឲ្យឆ្ងាយពីផែនដី និងកាត់បន្ថយល្បឿនរបស់វាឲ្យយឺតជាងមុន។ គិតមកទល់នឹង២៤ម៉ោងចុងក្រោយនេះ អាចម៍ផ្កាយ Dimorphos បានផ្លាស់ប្តូរគន្លងទាំងស្រុងហើយ វាមិនបង្កជាហានិភ័យដល់ភពផែនដីទៀតទេ ពោលគឺបានធ្វើដំណើរទៅរកគន្លងនៃអាចម៍ផ្កាយផ្សេងឈ្មោះ Didymos។
ទន្ទឹមនឹងជោគជ័យនេះ លោក Nelson បាននិយាយថា “យើងបានបង្ហាញពិភពលោកថា NASA គឺពិតជាអ្នកដែលការពារភពផែនដីនេះយ៉ាងប្រាកដ”។ អាចម៍ផ្កាយដែលមានអង្កត់ផ្ចិត ១៦០ ម៉ែត្រ ឬទំហំប្រហែលពីរ៉ាមីតអេហ្ស៊ីបដ៏ធំមួយ ទីបំផុតបានប្រែទៅជាផ្កាយដុះកន្ទុយដែលបង្កើតឡើងដោយមនុស្ស៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា