រថយន្តក្រឡុកស៊ីម៉ងត៍ចុះពីលើស្ពាន ក្រឡាប់សង្កត់លើម៉ូតូឱ្យបណ្ដាលឲ្យស្ត្រីម្នាក់ស្លាប់ភ្លាម

កណ្ដាល៖ រថយន្តក្រឡុកស៊ីម៉ងត៍ក្រុមហ៊ុនណេសសិនណល់ បើកចុះពីលើស្ពានក្នុងល្បឿន លឿនហ្វ្រាំងមិនជាប់ បណ្ដាលឱ្យក្រឡាប់សង្កត់លើស្ត្រីម្នាក់កំពុងនៅលើម៉ូតូស្លាប់ភ្លាម។

គ្រោះថ្នាក់ដ៏រន្ធត់នេះ បានកើតឡើងនៅភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល កាលពីម៉ោង៩ព្រឹក ថ្ងៃទី២២ ខែកញ្ញា ឆ្នាំ២០២២។មន្ត្រីនគរបាលស្រុកខ្សាច់កណ្ដាលបានឱ្យដឹងថា រថយន្តបង្កម៉ាក Fuso ពាក់ផ្លាកលេខ ភ្នំពេញ 5A-0276 ប្រភេទក្រឡុកស៊ីម៉ងត៍ របស់ក្រុមហ៊ុនណេសសិនណល់។អ្នកបើកបរឈ្មោះ អ៊ីត ថាច អាយុ៤៦ឆ្នាំនៅភូមិសូទៃ ឃុំញ៉ែងញ៉ង ស្រុកត្រាំកក់ ខេត្តតាកែវ ត្រូវឃាត់ខ្លួន។

ចំណែកស្ត្រីដែលស្លាប់ឈ្មោះ កាក់ សុខុន អាយុ៤៥ឆ្នាំ នៅភូមិស្វាយអាត់កណ្តាល ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បើកម៉ូតូម៉ាក PCX ផ្លាកលេខភ្នំពេញ1IU-0920។ មុនកើតហេតុ រថយន្តក្រឡុកស៊ីម៉ងត៍បើកចុះពីលើស្ពានព្រែកតាមាក់ក្នុងល្បឿនលឿន ជាន់ហ្វ្រាំងមិនជាប់ ក៏ក្រឡាប់ទៅលើម៉ូតូកំពុងឈប់បណ្ដាលឱ្យស្ត្រីនោះស្លាប់ភ្លាម៕

ដោយ៖វិចិត្រ