ព្រះវិហារ៖ រថយន្តភីកអាប់ដឹកទំនិញ២គ្រឿងនិងទូកចម្លង១គ្រឿង ដែលបានក្រឡាប់លិចទៅក្នុងបាតស្ទឹងសែនទាំងយប់ងងឹត រហូតមកដល់ពេលនេះមិនទាន់រកឃើញនៅឡើយទេ។
លោកវរសេនីយ៍ឯក ស៊ឹម សាយ អធិការនគរបាលស្រុករវៀងបានឱ្យដឹងថា កាលពីយប់ថ្ងៃទី២០ ខែកញ្ញា មានគ្រោះថ្នាក់ផ្លួវទឹកដោយទូកចម្លងនិងរថយន្តដឹកទំនិញ២គ្រឿងបានក្រឡាប់ក្នុងទឹកស្ទឹងសែន ស្ថិតនៅកំពង់ចម្លងក្នុងភូមិឫស្សីស្រុក ឃុំរួសរាន់ ស្រុករវៀង ខេត្តព្រះវិហារ។
ហេតុការណ៍នោះមានមនុស្ស៦នាក់នៅលើទូកចម្លងដែលបានលិច ក្នុងនោះមានតៃកុងរថយន្ត២នាក់ ព្រូរថយន្ត២នាក់និងអ្នកបើកទូក២នាក់។ចំណែកម្ចាស់រថយន្តដឹកទំនិញទាំង២គ្រឿងនោះឈ្មោះ កែវ ចាន់សូរិយ៉ា នៅភូមិត្នោតម្លូ ស្រុករវៀង ខេត្តព្រះវិហារ។ពួកគេរួចផុតពីគ្រោះថ្នាក់ខណៈបានតោងប៊ីដុងប្រេងនិងតោងដើមឫស្សីហែលសំដៅច្រាំងឡើងគោកទាំងយប់ងងឹត។រហូតមកដល់ពេលនេះ ទាំងទូកនិងរថយន្តមិនទាន់រកឃើញនៅឡើយទេ៕
ដោយ៖ភ្នំត្បែង
