ភ្នំពេញ៖សាជីវកម្មហិរញ្ញវត្ថុអន្តរជាតិ(IMF) និងធនាគារជាតិនៃកម្ពុជា(NBC) បានសហការរៀបចំវេទិកាហិរញ្ញវត្ថុសហគ្រាសខ្នាតតូច និងមធ្យមសាកល(Global SME Finance Forum) លើកទី៩នៅកម្ពុជា រយៈពេល៣ថ្ងៃ ផ្តើមពីថ្ងៃទី១៩ដល់២១ខែកញ្ញាឆ្នាំ២០២២។
កម្មវិធីលំដាប់អន្តរជាតិមួយនេះប្រារព្ធធ្វើជារៀងរាល់ឆ្នាំនិងបាននាំយកនូវស្ថាប័នហិរញ្ញវត្ថុក្រុមហ៊ុនFin-Techនិងស្ថាប័នអភិវឌ្ឍហិរញ្ញវត្ថុពីបណ្តប្រទេសជាច្រើនមកពិភាក្សាចែករំលែកចំណេះដឹង បទពិសោធន៍ក៏ដូចជានវានុវត្តន៍ដើម្បីលើកកម្ពស់នូវការរីកចម្រើននៃសហ – គ្រាសធនតូច និងមធ្យម។សម្រាប់វេទិកាឆ្នាំនេះធ្វើឡើងក្រោមប្រធានបទ“ការចាប់យកឌីជីថលូបនីយកម្មសម្រាប់ការផ្ដល់ហិរញ្ញប្បទាន ប្រកបដោយចីរភាព និងបរិយាបន្នសម្រាប់សហគ្រាសធុនតូចនិងមធ្យម”។
លោក ម៉ាធូវ ហ្គេមស៊័រ( Mathew Gamser) នាយកប្រតិបត្តិ វេទិកាសហគ្រាសហិរញ្ញវត្ថុសហគ្រាសធធុនតូចនិងមធ្យម(SME Finance Forum)បានថ្លែងថាកម្មវិធី Global SME Finance Forum នឹងក្លាយជាវេទិកាមួយដែលពោរពេញទៅដោយការចែករំលែកចំណេះដឹងល្អៗ និងបទពិសោធន៍ដ៏មានតម្លៃក៏ដូចជាពង្រឹងភាពជាដៃគូ ជាពិសេសទៅលើការហិរញ្ញប្បទាន ដើម្បីឱ្យសហគ្រាសធនតូច និងមធ្យមកាន់តែមានភាពរីកចម្រើន។
សន្និសីទរយៈពេលបីថ្ងៃរបស់Global SME Finance Forum នឹងស្វែងយល់ពីរបៀបដែលឌីជីថលូនីយកម្មអាចលើកកម្ពស់ និងពន្លឿនហិរញ្ញវត្ថុបៃតង បង្កើនប្រសិទ្ធភាពខ្សែសង្វាក់ផ្គត់ផ្គង់ ធ្វើឱ្យប្រសើរឡើងនូវសុវត្ថិភាពទិន្នន័យ ដំណើរការស្វ័យប្រវត្តិកម្ម ដែលនឹងនាំទៅបរិយាប័ន្នហិរញ្ញវត្ថុកាន់តែធំ។
ជាផ្នែកមួយនៃកម្មវិធីនេះ ធនាគារជាតិនៃកម្ពុជាកាលពីថ្ងៃទី១៩ខែកញ្ញា បានសូមស្វាគមការអញ្ជើញមកដល់របស់ភ្ញៀវអន្តរជាតិជាង៣០០ នាក់ មកពី ៦៥ ប្រទេសដែតំណាងឱ្យម្ចាស់ក្រុមហ៊ុន-សហគ្រាស តំណាងធនាគារកណ្តាល និងស្ថាប័នហិរញ្ញវត្ថុមកចូលរួមក្នុងវេទិកាហិរញ្ញវត្ថុសហគ្រាសធុនតូចនិងមធ្យមសកលប្រចាំឆ្នាំ២០២២៕ដោយៈសិរីមតី
