ភ្នំពេញ៖ ស្ត្រីកម្ពុជាចំនួន ៣៥០ នាក់បានបញ្ចប់ការសិក្សាពីគម្រោង‘ពង្រឹងបណ្តាញអាជីវកម្ម និងអភិវឌ្ឍអាជីវកម្ម’ ក្រោមការគាំទ្រថវិកាពីទីភ្នាក់ងារជំនួយ USAIDតាមរយៈគម្រោងនារីសកម្ម និងអនុវត្តដោយសហគ្រាសសង្គម ស៊ីអ៊ិនវេសមិន។
គម្រោងនេះបានជួយទៅដល់សហគ្រិនស្ត្រីវ័យក្មេងដែលរស់នៅក្នុងទីក្រុងភ្នំពេញ ខេត្តសៀមរាប ខេត្តកំពង់ចាមខេត្តកំពតនិងបាត់ដំបងដើម្បីមានលទ្ធភាពក្នុងការអភិវឌ្ឍអាជីវកម្មខ្នាតតូចបំផុតរបស់ពួកគាត់។
លោកស្រី រ៉េបេកា ប្លេកនាយិកាបេសកកម្មស្តីទីរបស់ទីភ្នាក់ងារជំនួយអាមេរិកប្រចាំប្រទេសកម្ពុជា បានថ្លែងថា៖“ពួកយើងមានមោទនភាពដែលបានផ្តល់ការគាំទ្រដល់សហគ្រិនស្ត្រីវ័យក្មេងជាច្រើននាក់តាមរយៈគម្រោងនារីសកម្មរបស់ពួកយើង និងស៊ីអ៊ិនវេសមិន។សហគ្រិនស្ត្រីដើរតួនាទីសំខាន់ក្នុងការពង្រឹងជីវភារបស់ប្រជាពលរដ្ឋនិងនយោបាយរបស់សង្គមប្រជាធិបតេយ្យដោយមិនត្រឹមតែតាមរយៈការបង្កើតនិងពង្រីកអាជីវកម្មរបស់ខ្លួនប៉ុណ្ណោះទេថែមទាំងការធ្វើការរួមគ្នាជាមួយសមាគមអាជីវកម្មនានាក្នុងការបង្កើតឲ្យមានផលជះវិជ្ជមានទៅគោលនយោបាយ សង្គម សេដ្ឋកិច្ច ផងដែរ។”
កម្មវិធី‘ពង្រឹងបណ្តាញអាជីវកម្ម និងអភិវឌ្ឍអាជីវកម្ម’ សម្រាប់សហគ្រិនស្ត្រីវ័យក្មេងគឺជាគម្រោងរយៈពេល ៣ឆ្នាំដែលអនុវត្តដោយសហគ្រាសសង្គម ស៊ីអិនវេសមិន ក្រោមការគាំទ្រថវិកាពីទីភ្នាក់ងារជំនួយអាមេរិកUSAIDតាមរយៈគម្រោងនារីសកម្ម របស់អង្គការផេកកម្ពុជា។ស៊ីអិនវេសមិន បានផ្តល់វគ្គបណ្តុះបណ្តាលអាជីវកម្មថ្នាក់មូលដ្ឋានចំនួន៦វគ្គគ្រប់គ្រងហិរញ្ញវត្ថុថ្នាក់មូលដ្ឋានចំនួន ១០ និងផ្តល់ជំនួយក្រោមគម្រោងកញ្ចប់ថវិកាខ្នាតតូចទៅកាន់សហគ្រិនស្ត្រី២ក្រុម។តាមរយៈការផ្តល់ជូនទាំងនោះក៏មានរួមបញ្ចូល វីដេអូស៊េរីនិងកម្មវិធីបណ្តាញសហគ្រិនស្ត្រីដែល បង្កើនឲ្យមានឱកាសជាច្រើន បូករួមទាំងការណែនាំ និងហ្វឹកហាត់ផ្សេងទៀតសម្រាប់សហគ្រិនស្ត្រី៕ដោយ ផាវី