ខ្សែបម្រើ Kevin De Bruyne មានអារម្មណ៍ថា ការរិះគន់ ឬតាមដានលើជីវិតឯកជន ចំពោះ ឬរបស់ខ្សែបម្រើប្រយុទ្ធ Jack Grealish គឺមិនពាក់ព័ន្ធនឹងបាល់ទាត់នោះទេ ហើយមានភាពតឹងតែងខ្លាំងពេក ដោយសារតែមិត្តរួមក្រុមរូបនេះជាកីឡាករជម្រើសជាតិអង់គ្លេស។
កីឡាករ Grealish បានចូលរួមជាមួយក្រុមមេឃខៀវ Manchester City ក្នុងតម្លៃផ្ទេរជាកំណត់ត្រារបស់ប្រទេសអង់គ្លេស ១០០លានផោន (១១៤,៥៤លានដុល្លារ) ក្នុងឆ្នាំ២០២១ តែមិនទាន់បានផ្ដល់នូវសមិទ្ធផល ដូចដែលរូបគេធ្វើបាននៅក្រុម Aston Villa នោះឡើយ។
បន្ទាប់ពីស៊ុតបញ្ចូលទីបាន ៦គ្រាប់ និងបញ្ជូនឱ្យមិត្តរួមក្រុម (Assist) ១០គ្រាប់ ក្នុងចំណោមការប្រកួត ២៦ដង នៅក្របខ័ណ្ឌ Premier League សម្រាប់ក្រុម Villa រដូវកាល ២០២០-២០២១ កីឡាករ Grealish រួមចំណែកត្រឹមតែ ៣គ្រាប់ និង Assist ៣ដងប៉ុណ្ណោះ ក្នុងចំនួនដូចគ្នានៃការបង្ហាញខ្លួននៅរដូវកាលដំបូងក្នុងក្រុម Man City។
ការចាប់ផ្តើម នៅរដូវកាល ២០២២-២០២៣ នេះ ក៏ស្ថិតក្នុងលទ្ធផលមិនជាទីគាប់ចិត្តដដែល បើទោះបីជាខ្សែបម្រើប្រយុទ្ធស្លាបរូបនេះ បានស៊ុតបាល់បញ្ចូលទីគ្រាប់ដំបូងរបស់ខ្លួន ក្នុងជ័យជម្នះ ៣-០ លើក្រុម Wolverhampton Wanderers កាលពីថ្ងៃសៅរ៍ក៏ដោយ។
យ៉ាងណាក្ដី កីឡាករ De Bruyne ដែលបានការបញ្ជូនបាល់ដើម្បីរួមចំណែកបង្កើតគ្រាប់ដំបូងដ៏លឿននោះ បានចេញមកការពារមិត្តរួមក្រុមមេឃខៀវរបស់ខ្លួន ដែលសូម្បីរបៀបរស់នៅ ក៏ត្រូវបានពិនិត្យតាមដានផងដែរ ចាប់តាំងពីការចុះហត្ថលេខា ជាមួយក្រុមរបស់លោក Pep Guardiola។
កីឡាករ De Bruyne បាននិយាយថា៖ «វាមិនពាក់ព័ន្ធនឹងបាល់ទាត់នោះឡើយ។ វាមានអ្វីលើសពីបាល់ទាត់ ដោយការផ្តោតសំខាន់គឺទៅលើកីឡាករអង់គ្លេស។ ខ្ញុំយល់ ព្រោះពួកគេជាជនជាតិអង់គ្លេស ហើយមនុស្សមានទំនោរមើលទៅអ្វីដែលកំពុងកើតឡើង»។
«ខ្ញុំមានអារម្មណ៍ថា ជាឧទាហរណ៍ ប្រសិនបើកីឡាករបរទេសចេញក្រៅ នៅពេលយប់ យើងពិតជាមិនត្រូវបានគេត្រួតពិនិត្យញឹកញាប់នោះទេ ហើយខ្ញុំមានអារម្មណ៍ថា ប្រសិនបើកីឡាករអង់គ្លេសចេញទៅខាងក្រៅវិញ វាតែងតែស្ថិតនៅក្នុងប្រព័ន្ធផ្សព្វផ្សាយ នាកន្លែងណាមួយជាមិនខាន»។ កីឡាករ De Bruyne បានបន្ត។
កីឡាករអន្តរជាតិបែលហ្ស៊ិក បានបន្ថែមថា៖ «ខ្ញុំគិតថា មនុស្សកំពុងយករឿងនេះមកពាក់ព័ន្ធផងដែរ។ អ្វីដែលរូបគេប្រព្រឹត្តក្នុងជីវិតឯកជនរបស់ខ្លួន មិនគួរមាននរណាម្នាក់ត្រូវខ្វល់ខ្វាយនោះទេ តែមនុស្សទាំងនោះបានធ្វើបែបហ្នឹង»៕
