ភ្នំពេញ៖ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលកម្ពុជា បានឱ្យដឹងថា៖រដ្ឋាភិបាលកម្ពុជាបាន និងកំពុងរៀបចំនូវចក្ខុវិស័យដ៏វែងឆ្ងាយ ក្នុងវិស័យសុខាភិបាលកម្ពុជា ដោយបានបង្កើតនូវមន្ទីរពេទ្យធំមួយទៀតដែលមានចំនួនគ្រែដល់ទៅជាង៩ពាន់គ្រែ នៅម្តុំបឹងតាមោក។ មន្ទីរពេទ្យនេះ នឹងក្លាយជាមន្ទីរពេទ្យជាតិធំជាងគេ ដោយសារមានចំនួនគ្រែច្រើន ដែលអាចទទួលអ្នកជំងឺ ក៏ដូចជាមានផ្តល់នូវសេវាព្យាបាលជាច្រើនផងដែរ។
ថ្លែងក្នុងសន្និសីទសារព័ត៌មាននាពេលថ្មីៗស្ដីពី «សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសុខាភិបាល» លោក ជំទាវ យក់ សម្បត្តិ បានមានប្រសាសន៍ទៀតថា មន្ទីរពេទ្យនេះ នឹងក្លាយជាមន្ទីរពេទ្យជាតិធំជាងគេដោយសារមានចំនួនគ្រែច្រើន ហើយមានសេវាព្យាបាលជាច្រើនដូចជា សេវាសង្គ្រោះបន្ទាន់ មានសេវាវះកាត់ ផ្សេងៗ។
លោកជំទាវ យក់ សម្បត្តិ បានបញ្ជាក់ថាគិតមកដល់ពេលនេះសំណង់មន្ទីរពេទ្យសម្រេច ប្រហែលជា៦០%ទៅ៦៥%ហើយ។ រដ្ឋាភិបាល សង្ឃឹមថា នឹងបើកដំណើរការនៅឆ្នាំក្រោយនេះ នៅខែមេសា ឬឧសភាហើយនឹងបើកដំណើរការអាចបាន៥០%។
លោកជំទាវ បន្តថា មន្ទីរពេទ្យនេះគឺជាមន្ទីរពេទ្យមួយអាចទប់ស្កាត់ ប្រជាពលរដ្ឋនៅប៉ែកស្រុកពញាព ព្រំប្រទល់កំពង់ស្ពឺ កណ្តាល ភ្នំពេញ ដូច្នេះប្រជាពលរដ្ឋមិនបាច់បញ្ជ្រៀតនៅភ្នំពេញ ដើម្បីមកទទួលសេវានៅមន្ទីរពេទ្យកណ្តាលនេះឲ្យស្ទះទេ យើងអាចកាត់បន្ថយ ទាំងការកកស្ទះ ទាំងធ្វើឲ្យសេវាមួយចំនួនអាចផ្តល់ជូននៅក្នុងមន្ទីរពេទ្យតេជោសន្តិភាពនៅទីនោះ៕ដោយៈសិរីមតី
