ភ្នំពេញ៖ កម្ពុជានិងសាធារណរដ្ឋកូរ៉េ កំពុងសម្លឹងទៅរកលើកិច្ចសហប្រតិបតិ្តការលើវិស័យឧស្សាហកម្មរ៉ែ ខណៈភាគីកូរ៉េបានបង្ហាញចំណាប់អារម្មណ៍ចង់វិនិយោគលើវិស័យរ៉ែនៅកម្ពុជានិងបានស្នើឲ្យកម្ពុជា លើកជាគម្រោងសិក្សាលម្អិតបន្ថែម ទៅលើសក្ដានុពលរ៉ែ។
ក្នុងជំនួបសម្តែងការគួរសម និងពិភាក្សាការងារ រវាងលោក អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ ជាមួយលោក Lee HyuKsang លេខាធិការទី១ នៃស្ថានទូតសាធារណរដ្ឋកូរ៉េប្រចាំកម្ពុជា នាពេលថ្មីៗនេះ ភាគីកូរ៉េ បានស្វែងយល់អំពីបច្ចុប្បន្នភាព នៃការអភិវឌ្ឍវិស័យរ៉ែ និងការវិនិយោគលើវិស័យរ៉ែនៅកម្ពុជា ដែលក្រុមហ៊ុនរបស់ប្រទេសកូរ៉េ បានបង្ហាញចំណាប់អារម្មណ៍ចង់វិនិយោគ លើវិស័យរ៉ែនៅកម្ពុជា។
លោក អ៊ឹង ឌីប៉ូឡា បានឲ្យដឹងថា វិស័យរ៉ែនៅកម្ពុជា ដែលភាគីកូរ៉េ បានបង្ហាញនូវចំណាប់អារម្មណ៍ ចង់វិនិយោគរួមមាន៖រ៉ែទង់ដែង,ម៉ង់កាណែស(Manganese),លីស្យូម( Lithium) និងរ៉ែផ្សេងៗទៀត។
លោក បានបញ្ជាក់ថា៖ការសិក្សាតាំងពីសម័យបារាំងមក សព្វថ្ងៃនេះ កម្ពុជាបានរកឃើញនូវសក្ដានុពលរ៉ែមួយចំនួន បន្ទាប់មកក៏បន្ដកិច្ចសហការ ជាមួយជប៉ុន, កូរ៉េ, ចិន, ឆែក និងរុស្សី ក៏ប៉ុន្ដែការសហការគ្នានេះ មិនទាន់អាចសិក្សា ទៅបានគ្រប់ទីតាំង និងបានស៊ីជម្រៅ អំពីសក្ដានុពលរ៉ែនីមួយៗ ច្បាស់លាស់៕ដោយៈសិរីមតី
