ភ្នំពេញ៖យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជានៅរយៈពេល ៨ខែដំបូង ឆ្នាំ២០២២ នេះ កម្ពុជាទទួលបានចំណូល ពីការនាំចេញជ័រកៅស៊ូ និងផលិតផលធ្វើពីកៅស៊ូ មានចំនួនជាង ៣រយលានដុល្លារ មានការកើនជាង ២៤% បើធៀបនឹងរយៈ ពេលដូចគ្នាក្នុងឆ្នាំ២០២១ ។ តែទោះយ៉ាងណាក៏ដោយខ្សែចង្វាក់ផលិតកម្មដំណាំកៅស៊ូនាពេលបច្ចុប្បន្ន នៅតែមានជួបបញ្ហាប្រឈមមួយចំនួន រួមទាំងស្ថានភាពទីផ្សារ និងតម្លៃកៅស៊ូមិនមានស្ថិរភាពជាដើម។
ឯកឧត្តម ហ៊ឹម អូន ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកៅស៊ូ បានគូសបញ្ជាក់ថា ស្ថានភាពទីផ្សារ និងតម្លៃនៃការនាំចេញកៅស៊ូ នាពេលបច្ចុប្បន្ន ហាក់មានការថយចុះជាងឆ្នាំមុន ពោលគឺ តម្លៃលក់ជ័រកៅស៊ូ គិតចាប់ពីខែមករាឆ្នាំរហូតមក ដល់ខែសីហា ឆ្នាំ២០២២ មានតម្លៃជាមធ្យម ១៥៥៣ ដុល្លារក្នុងមួយតោន ថយចុះ ១៩៩ ដុល្លាក្នុងមួយតោន ឬស្មើនឹងអត្រាធ្លាក់ចុះ ៧% ធៀបនឹងរយៈពេលដូចគ្នាកាលពីឆ្នាំមុន។ ដោយឡែក តម្លៃលក់ជ័រកៅស៊ូជាមធ្យមគិតក្នុងខែសីហា មានតម្លៃ ១៤៣១ ដុល្លាក្នុងមួយតោន បានថយចុះចំនួន ៨៣ដុល្លារក្នុងមួយតោន ស្មើនឹងជាង ៥% ធៀបនឹងខែមុន និងបានថយចុះចំនួន ២៣៩ដុល្លារក្នុងមួយតោន ស្មើនឹង១៤%ធៀបនឹងតម្លៃកាលពីខែសីហាឆ្នាំមុន។
តម្លៃកៅស៊ូមិនមានស្ថិរភាព នៅតែបន្តធ្លាក់ចុះនេះ ដោយសារកត្តាមួយចំនួនបណ្តាលមកពីវិបត្តិមសេដ្ឋកិច្ចសកល ការប្រែប្រួលតម្លៃថាមពល អតុល្យភាពរវាងការផ្គត់ផ្គងនិងតម្រូវការ និងការប្រែប្រួលរូបិយបណ្ណធៀបនឹងប្រាក់ដុល្លាអាមេរិកជាដើម។ ទីផ្សារសំខាន់ៗ ក្នុងការនាំចេញកៅស៊ូរបស់កម្ពុជា មានដូចជា វៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុបជាដើម៕ដោយៈសិរីមតី