ភ្នំពេញ៖ស្ត្រីម្នាក់បានឈឺពោះឆ្លងទន្លេសម្រាលបានកូនស្រីនៅលើចិញ្ចើមផ្លូវ បង្កការភ្ញាក់ផ្អើលយ៉ាងខ្លាំង ត្រូវបានពលរដ្ឋជួយហៅរថយន្តមកដឹកយកម្តាយនិងកូនទៅមន្ទីរពេទ្យរុស្សី។
សភាពការណ៍ដ៏កម្សត់នេះបានកើតឡើងនៅជិតស្ថានីយបូមទឹកបឹងត្របែក ផ្លូវលេខ២៧១ ក្នុងសង្កាត់ផ្សារដើមថ្កូវ ខណ្ឌចំការមន កាលពីរំលងអធ្រាត្រឈានចូលថ្ងៃទី១៥ ខែកញ្ញាឆ្នាំ២០២២។ស្ត្រីខាងលើឈ្មោះឃឹម ដាលីន អាយុ២៦ឆ្នាំ ជាកម្មកររោងចក្រផលិតនំ ស្នាក់នៅ ភូមិមិត្តភាព១ សង្កាត់ព្រែកឯង ខណ្ឌច្បារអំពៅ។
ស្ត្រីជាម្តាយទារិកាបានប្រាប់ថា មុនមានករណីនេះកើតឡើង នាងបានឈឺពោះឆ្លងទន្លេ។ពេលនោះប្តីក៏បានដឹកតាមម៉ូតូបំណងទៅសម្រាលនៅមន្ទីរពេទ្យឫស្សីស្រស់។តែពេលមកដល់មន្ទីរពេទ្យបានលិចទឹក ហើយពួកគាត់ក៏បន្តទៅមន្ទីរពេទ្យច្បារអំពៅទៀត។លុះដល់មន្ទីរពេទ្យច្បារអំពៅ គ្រូពេទ្យអត់ទទួល ទើបពួកគាត់បន្តទៅមន្ទីរពេទ្យរុស្ស៊ី។មកដល់ជិតស្ថានីយបូមទឹកស្អុយបឹងត្របែកគាត់ឈឺពោះខ្លាំងពេកបានឈប់ម៉ូតូអែបចិញ្ចើមផ្លូវក៏សម្រាលបានកូនស្រីម្នាក់តែម្តង៕
ដោយ៖វិចិត្រ