ភ្នំពេញ៖ យើងដឹងហើយថា ក្រុមហ៊ុនជប៉ុន មុនទៅវិនិយោគនៅប្រទេសណា គឺបានសិក្សាល្អិតល្អន់ណាស់ ។នៅទីបំផុតក្រុមហ៊ុនToyota Tsusho Manufacturing (Cambodia) Co., Ltd. បានសម្រេចចិត្តមកវិនិយោគនៅកម្ពុជា ជាមួយទុនដំបូងរបស់ខ្លួនចំនួន៣៦,៧លានដុល្លារអាមេរិក។
គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC)បានអនុម័តចេញវិញ្ញាបនបត្រចុះបញ្ជីជាគម្រោងវិនិយោគដល់ក្រុមហ៊ុនToyota ដើម្បីបង្កើតរោងចក្រផ្គុំ និងតម្លើងរថយន្តតូយ៉ូតា ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៣៦,៧លានដុល្លារអាមេរិក និងបង្កើតការងារបានចំនួនប្រមាណ ១៥០នាក់។
ក្រៅពីអនុម័តដល់ក្រុមហ៊ុនតូយ៉ូតា CDC ក៏បានចេញវិញ្ញាបនបត្រចុះបញ្ជីជាគម្រោងវិនិយោគដលក្រុមហ៊ុនចំនួន៤ទៀត គឺ៖
១-WCFO (Cambodia) Co.,Ltd.គម្រោងបង្កើតរោងចក្រផលិតប្រអប់និងគ្រឿងបង្គុំផ្សេងៗធ្វើពីលោហៈ។ទីតាំងវិនិយោគនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុបភ្នំពេញ, រាជធានីភ្នំពេញ,មានទុនវិនិយោគចំនួន៣,៨លានដុល្លារអាមេរិកនិងបង្កើតការងារបានចំនួនប្រមាណ ១៥០នាក់។
២-Thirty Three Apparels (Cambodia) Co., Ltd. គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ,រាជធានីភ្នំពេញ,មានទុនវិនិយោគចំនួន២,១លានដុល្លារអាមេរិកនិងបង្កើតការងារបានចំនួនប្រមាណ៤៥០នាក់។
៣- “A & M Clothing Co., Ltd.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១ លានដុល្លារអាមេរិក និងបង្កើតការងារបានចំនួនប្រមាណ ១០០នាក់។
៤- WCFO ASAMA Co., Ltd.គម្រោងបង្កើតរោងចក្រផលិតគ្រឿងបន្ទាប់បន្សំ សម្រាប់ឧបករណ៍បញ្ជូនទិន្នន័យធ្វើពីប្លាស្ទិកដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួនជាង ៨០ម៉ឺនដុល្លារអាមេរិកនិងបង្កើតការងារបានចំនួនប្រមាណ ១០០នាក់៕ដោយៈសិរីមតី