ភ្នំពេញ៖ក្នុងអំឡុងពេលកូវីដ១៩ វាយលុកខ្លាំង ចំនួនទេសចររវាងកម្ពុជានិងម៉ាឡេស៊ីបានធ្លាក់ចុះហើយបច្ចុប្បន្ននេះដោយសារវិបត្តិកូវីដបានធូរស្រាល ចរន្តទេសចរបានចាប់ផ្តើមរើបឡើងវិញបន្តិច ហើយក្នុងគោលបំណងស្តារវិស័យទេសចរណ៍ឱ្យដូចពេលមុនវិញ ម៉ាឡេស៊ី បាននិងកំពុងផ្សព្វផ្សាយគោលដៅទេសចរណ៍របស់ខ្លួនហើយបានដករបាំងនិងលក្ខខណ្ឌសុខាភិបាលចេញ។
ទាក់ទងនឹងបរិបទនេះ ស្ថានទូតម៉ាឡេស៊ីប្រចាំកម្ពុជានិងក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី បានរៀបចំពិព័រណ៍ទេសចរណ៍ម៉ាឡេស៊ី«Let’s Go Malaysia Travel Fair 2022 » នៅផ្សារទំនើបអ៊ីអនភ្នំពេញ រយៈពេល៣ថ្ងៃចាប់ពីថ្ងៃទី២ដល់ថ្ងៃទី៤ ខែកញ្ញា ឆ្នាំ ២០២២។ ក្នុងពិធីសម្ពោធជាផ្លូវការនៃកម្មវិធីពិព័រណ៍នាព្រឹកថ្ងៃទី២នេះមានការចូលរួមពីសំណាក់ដាទុក អ៊ែលដិន ហ៊ូសៃនី ម៉ូដហាស្ស៊ីម (Datuk Eldeen Husaini Mohd Hashim) ឯកអគ្គរាជទូតម៉ាឡេស៊ីប្រចាំកម្ពុជា,លោក សូ ម៉ារ៉ា រដ្ឋលេខាធិការក្រសួងទេសចរណ៍ និង លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា(CATA)។
លោកស្រី ពត រ៉ានី ប្រធានគ្រប់គ្រងទីផ្សារប្រចាំក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី បានឱ្យដឹងថា ពិព័រណ៍ទេសចរណ៍ម៉ាឡេស៊ីនេះមានគោលបំណងផ្សព្វផ្សាយនិងបង្កើនការទាក់ទាញភ្ញៀវទេសចរក៏ដូចជាបង្ហាញពីផលិតផលទេសចរណ៍ថ្មីៗនៅម៉ាឡេស៊ីព្រមទាំង ពង្រឹងកិច្ចសហប្រតិបត្តិការក្នុងវិស័យទេសចរណ៍នៃប្រទេសទាំងពីរ កម្ពុជា-ម៉ាឡេស៊ី។
លោកស្រី ពត រ៉ានី បានបន្តថា ការតាំងពិព័រណ៍ទេសចរណ៍នេះដែរក៏មានការចូលរួមសហការដោយភ្នាក់ងារទេសចរណ៍ក្នុងស្រុកចំនួន១២ក្រុមហ៊ុនដែលបានមកដាក់តាំងលក់កញ្ចប់សេវាកម្មទេចរណ៍ទៅកាន់ប្រទេសម៉ាឡេស៊ី រួមមាន ក្រុមហ៊ុន World Pop Travel & Tours, ក្រុមហ៊ុន R.T.R Tours, ក្រុមហ៊ុន Sky King Travel & Tours, ក្រុមហ៊ុន 2 World Travel Cambodia, ក្រុមហ៊ុន Gold Star Travel & Tours, ក្រុមហ៊ុន Global Holiday Travel & Tours, ក្រុមហ៊ុន TNTO Travel & Tours, ក្រុមហ៊ុន Ann Loue Travel & Tours, ក្រុមហ៊ុន Fun Trip Travel & Tours, ក្រុមហ៊ុន SakonaTravel&Tours។ក្រៅពីនេះមានក្រុមហ៊ុនអាកាសចរណ៍ចំនួន៣ដែល មានជើងហោះហើរត្រង់កម្ពុជា-ម៉ាឡេស៊ី រួមមាន ក្រុមហ៊ុន Malaysia Airlines, ក្រុមហ៊ុន AirAsia និងក្រុមហ៊ុន Lanmei Airlinesព្រមទាំងធនាគាកម្ពុជាសាធារណៈ, Medial Tourism ដែលមកពី Sunway Medical Centre។ ក្រុមហ៊ុនទាំងនេះនឹងផ្សព្វផ្សាយរយៈពេល៣ថ្ងៃជាមួយនឹងការលក់ប្រូម៉ូសិពិសេសលើកញ្ចប់សេវាកម្មដំណើរកម្សាន្ត ការកក់ជើងហោះហើរ និងសេវាកម្មទេសចរណ៍ផ្សេងទៀត។ លើសពីនេះក៏មានទីភ្នាក់ងារ Tourism Malaysiaជាទីភ្នាក់ងារមួយស្ថិតក្រោមក្រសួងទេសចរណ៍ សិល្បៈ និងវប្បធម៌ម៉ាឡេស៊ី។
លោកឯកអគ្គរាជទូត អ៊ែលដិន ហ៊ូសៃនី ម៉ូដ ហាស្ស៊ីម បានថ្លែងថា៖បច្ចុប្បន្នប្រទេសម៉ាឡេស៊ីមិនតម្រូវឱ្យមានលក្ខខណ្ឌអ្វីទៀតឡើយសម្រាប់ភ្ញៀវទេសចរអន្តរជាតិដែលចូលទៅកាន់ប្រទេសខ្លួន ពោលគឺលែងមានការធ្វើតេស្ត ឬការធ្វើចត្តាឡីស័ក ការបង់ប្រាក់ធានា ដូចកាលពីពេលរីករាលដាលជំងឺកូវីដខ្លាំងនោះឡើយ។
លោក ឯកអគ្គរាជទូត បានឲ្យដឹងថា៖ទីក្រុងគូឡាឡាំពួ កោះឡាងកាវី រដ្ឋចូហូ រដ្ឋសារ៉ាវ៉ាក់ រដ្ឋម៉ាឡាកា ក៏ដូចជាកោះ ឆ្នេរសមុទ្រ ទីក្រុងទេសចរណ៍ដទៃទៀត គឺបានត្រៀមស្វាគមន៍ភ្ញៀវទេសចរពីកម្ពុជារួចជាស្រេច។ ភ្ញៀវទេសចរដែលចង់ទៅម៉ាឡេស៊ី គ្រាន់តែទិញសំបុត្រយន្តហោះ ហើយរៀបចំអីវ៉ាន់អាចទៅបានតែម្ដង។
លោកឯកអគ្គរាជទូតបានបន្តថាពេលនេះជាពេលដ៏ស័ក្តិសមបំផុតក្នុងការទៅទស្សនាកម្សាន្តនៅម៉ាឡេស៊ីពីព្រោះអាកាសធាតុអំណោយផល ខណៈរមណីយដ្ឋាន គោលដៅទេសចរណ៍ សណ្ឋាគារ ផ្សារទំនើប និងសេវាកម្មទេសចរណ៍ គឺត្រូវបានបើកយ៉ាងទូលំទូលាយវិញអស់ហើយ។
ជាមួយគ្នានោះ លោកឯកអគ្គរាជទូតម៉ាឡេស៊ីបានបញ្ជាក់ទៀតថា នៅប្រទេសម៉ាឡេស៊ីក៏តែងមានការផ្សព្វផ្សាយអំពីទេសចរណ៍កម្ពុជាផងដែរដើម្បីជំរុញចលនាភ្ញៀវទេសចរពីម៉ាឡេស៉ីមកកម្ពុជា ខណៈបច្ចុប្បន្នមានភ្ញៀវទេសចរម៉ាឡេស៉ីមកកាន់កម្ពុជាច្រើនណាស់ដែរ គឺរហូតដល់៨,០០០នាក់បន្ទាប់ពីប្រទេសទាំងពីប្រកាសបើកទទួលភ្ញៀវទេសចរអន្តរជាតិឡើងវិញនោះ។ក្រោយកម្មវិធីពិព័រណ៍ទេសចរណ៍នេះ លោករំពឹងថាចំនួនទេសចរកម្ពុជាទៅម៉ាឡេស៊ីនឹងកើនឡើង។
លោកបានឲ្យដឹងផងដែរថា ក្នុងយុទ្ធនាការផ្សព្វផ្សាយទេសចរណ៍នេះ ក៏មានកញ្ចប់ទេសចរណ៍ពិសេសៗ ដែលក្នុងនោះរួមមានការបញ្ចុះតម្លៃសំបុត្រយន្តហោះ និងបញ្ចុះតម្លៃកញ្ចប់ទេសចរណ៍ជាដើម។
លោកសូ ម៉ារ៉ា រដ្ឋលេខាធិការក្រសួងទេសចរណ៍ បានថ្លែងលើកទឹកចិត្តដល់ភាគីម៉ាឡេស៊ីក៏ដូចជាក្រុមហ៊ុនទេសចរណ៍នៅកម្ពុជាសហការគ្នាចូលរួមផ្សព្វផ្សាយពីទេសចរណ៍នៃប្រទេសទាំងពីរ ក្រោមទិសស្លោក «ប្រទេសពីរ គោលដៅតែមួយ» ដើម្បីទាក់ទាញជំរុញចលនាទេសចរទៅវិញទៅមក។
លោកបានបន្តថា៖ម៉ាឡេស៊ី ជាគោលដៅដ៏មានសក្តានុពលលើវិស័យទេសចរណ៍ ហើយលោកសង្ឃឹមថា ប្រជាជនកម្ពុជាភាគច្រើននឹងទៅលេងម៉ាឡេស៊ីហើយនៅពេលខាងមុខកម្ពុជាក៏មានគម្រោងផ្សព្វផ្សាយទេសចរណ៍នៅម៉ាឡេស៊ីដើម្បីទាក់ទាញទេសចរម៉ាឡេស៊ីមកទស្សនកិច្ចកម្ពុជាផងដែរ។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានបង្ហាញក្ដីរំពឹងទុកថា តាមរយៈជើងហោះហើរត្រង់រវាងកម្ពុជា-ម៉ាឡេស៊ីនិងកិច្ចសហប្រតិបត្តិការលើវិស័យទេសចរណ៍ល្អជាមួយគ្នាឡើងវិញនេះប្រទេសទាំងពីរនឹងទទួលបានភ្ញៀវទេសចរកាន់តែច្រើនជាងមុនពីព្រោះប្រទេសទាំងពីរសុទ្ធតែមានភាពទាក់ទាញខ្លាំងដូចគ្នា។
លោកស្រី បានថ្លែងថា ៖ ម៉ាឡេស៊ី ជាគោលដៅទេសចរណ៍អាទិភាពមួយរបស់ប្រជាជនកម្ពុជា ទាំងការធ្វើដំណើរកម្សាន្តនិងជំនួញ ។ ទីភ្នាក់ងារទេសចរណ៍ប្រទេសទាំងពីរនឹងបង្កើនការរៀបចំកញ្ចប់ទេសចរណ៍ពិសេសសម្រាប់អ្នកធ្វើដំណើរកម្ពុជាទៅម៉ាឡេស៊ីនិងទេសចរម៉ាឡេស៊ីមកកម្ពុជា៕ដោយៈផាវី
