ស្រ្តីជាម្តាយជាច្រើនតែងជួបបញ្ហាលំបាកនៅពេលកូនតូចរបស់ខ្លួនកើតអាការក្តៅខ្លួន។ការកើតអាការក្តៅខ្លួន ដែលភាគច្រើនតែងផ្តើមចេញពីគ្រុនផ្តាសាយ រលាកបំពង់ក ឬកើតចេញពីអាការផ្សេងទៀត គឺតែងបង្កផលលំបាកខ្លាំង ពិសេសការក្តៅខ្លួនចាប់ពីជាង៣៩អង្សាសេឡើងទៅ។
ជាមួយគ្នា ការបំបាត់អាការឱ្យកូនតូចបាត់ក្តៅខ្លួនវាជារឿងមិនងាយស្រួលសោះឡើយសម្រាប់ស្រ្តីជាម្តាយ។
នៅទីនេះ យើងនឹងណែនាំចំពោះការជូតខ្លួនកុមារដើម្បីកាត់បន្ថយកម្តៅ ឬគ្រុន។
ត្រូវចងចាំថា ការជូតខ្លួនកូនតូចដោយទឹកក្តៅឧណ្ហៗអាចជួយកាត់បន្ថយកម្តៅក្នុងខ្លួន ក្រៅអំពីការឱ្យលេបថ្នាំបញ្ចុះកម្តៅ។ត្រូវចងចាំ ការជូតខ្លួនកូនតូចផ្តួបផ្សំ ក៏ជាវិធីដ៏ល្អមួយសម្រាប់បញ្ចុះកម្តៅ ចៀសវាងប្រើតែឱសថបញ្ចុះកម្តៅតែមួយមុខ។
*តើត្រូវត្រៀមអ្វីខ្លះ៖
ទឹកក្តៅឧណ្ហៗ, កន្សែងពោះគោ ក្រមា ២-៣ផ្ទាំង,ចានដែកជាដើម។
*វិធីជូតខ្លួនកូនតូចដូចម្តេចឱ្យបានត្រឹមត្រូវ៖
-ត្រៀមទឹកក្តៅឧណ្ហៗនិងទីកន្លែងសមរម្យសម្រាប់ជូតខ្លួនឱ្យរួចរាល់
-ដោះសម្លៀកបំពាក់កូនតូចចេញ
-ប្រើកន្សែងពោះគោជ្រលក់ទឹកក្តៅឧណ្ហៗ រួចពូតឱ្យសល់សំណើមទឹកតិចល្មមៗប្រើជូតផ្ទៃមុខ,ជូតដៃនិងជើងទាំងសងខាង,ជូតថ្ងាសនិងក្បាល, ជូតតាមដងខ្លួន, ផ្ទៃមុខ,ជូតត្រង់ក្រលៀននិងក្លៀក ប្រែខ្លួនកូនតូចឱ្យដេកផ្អៀងនិងជូតខ្នង
ក្រោយការជូតដងខ្លួនឱ្យស្ងួត ហើយបើឃើញថាលែងសូវឡើងកម្តៅហើយ អាចរកសម្លៀកបំពាក់រលុងៗនិងមិនស្អុះស្អាប់មកស្លៀកពាក់ឱ្យកូនតូចវិញ។
*កត់ចំណាំ
-ត្រូវវាស់កម្ដៅកូនតូចក្នុងចន្លោះពី ១៥-៣០នាទីម្តង បើឃើញថាកម្តៅថយចុះហើយ មានន័យថាការជូតបានទទួលផលហើយ។
-កុមារដែលកើតអាការក្តៅខ្លួនគឺមានន័យថាចាប់ពីមានកម្តៅ ៣៧-៣៨អង្សាសេ
-ការជូតខ្លួនកូនតូចគួរអនុវត្តរយៈពេលចាប់ពី ១០-២០នាទី ឬតាមភាពសមរម្យ ហើយត្រូវធ្វើការផ្លាស់ប្តូរទឹកក្តៅឱ្យបានញឹកញាប់ដើម្បីធ្វើយ៉ាងណាឱ្យទឹកក្តៅឧណ្ហៗជាប់ជានិច្ច។ក្រោយការជូតរយៈពេល១៥នាទីហើយ ត្រូវវាស់កម្តៅកូនតូចមើលថាត្រជាក់ខ្លួនវិញហើយឬនៅ។
-ករណីឃើញថាកូចតូចអំឡុងពេលជូតខ្លួនរងាញ័រញាក់គួរបញ្ឈប់ជូតខ្លួនភ្លាម ហើយបើអាការមិនបាត់ទេ គួរប្រញាប់នាំទៅជួបគ្រូពេទ្យដើម្បីបំបាត់អាការវិញ៕
ប្រែសម្រួលចេញពីឯកសារបរទេស(sikarin)
ដោយ៖ឧត្តម