កំពង់ចាម៖ លោកវេជ្ជបណ្ឌិត TAKESHI KASAI នាយកប្រចាំតំបន់ប៉ាស៊ីហ្វិក ខាងលិច នៃអង្គការសុខភាពពិភពលោកបានស្នើឱ្យកម្ពុជាដែលជាជើងឯកមួយទទួលបានពានរង្វាន់ពិភពលោកផ្នែកការគ្រប់គ្រងថ្នាំជក់ ងាកមកផ្តោតលើជំងឺដែលមិនឆ្លង និងផ្តោតលើបញ្ហាសុខភាពតែម្តង។
ការស្នើរបស់នាយកប្រចាំតំបន់ប៉ាស៊ីហ្វិកខាងលិច នៃអង្គការសុខភាពពិភពលោក ធ្វើឡើងក្នុងជំនួបសម្តែងការគួរសម និងពិភាក្សាការងារលើវិស័យសុខាភិបាល នៅសាលាខេត្តកំពង់ចាមជាមួយរដ្ឋបាលខេត្ត ដឹកនាំដោយលោក អ៊ុន ចាន់ដា ជាអភិបាលខេត្ត និងគណៈប្រតិភូក្រសួងសុខាភិបាលដឹកនាំដោយលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល កាលពីរសៀលថ្ងៃទី ២ កក្កដាម្សិលមិញ។
លោក TAKESHI KASAI បានមានប្រសាសន៍ថា៖ អ្វីដែលជាឧបសគ្គ ឬបញ្ហាសុខភាព គឺយើងមិនសំដៅតែទៅលើជំងឺឆ្លងមួយមុខប៉ុណ្ណោះទេ គឺយើងពិភាក្សាដោះស្រាយចំពោះបញ្ហាផ្សេងៗ គឺជំងឺលើសឈាម ជំងឺទឹកនោមផ្អែម និងជំងឺមហារីក ដែលយើងហៅថាជំងឺដែលមិនឆ្លងនោះ។ ដោយជាយុទ្ធសាស្រ្តក្នុងការដោះស្រាយជំងឺមិនឆ្លងនេះ គឺយើងត្រូវតែមានកំណែទម្រង់ទៅលើប្រព័ន្ធ ដែលយើងកំពុងមានរាល់ថ្ងៃមានន័យថា ធ្វើការផ្លាស់ប្តូរពីការផ្តោតលើជំងឺ គឺផ្លាស់ប្តូរមកផ្តោតលើបញ្ហាសុខភាពម្តង។
លោកបានបន្ថែមថា៖ ព្រោះថាប្រព័ន្ធកំពុងប្រើប្រាស់សព្វថ្ងៃ ឬមានសព្វថ្ងៃនេះ គឺសង្ឃឹមឬ រំពឹងទុករបស់ប្រជាពលរដ្ឋ នៅពេលឈឺ ឬមានបញ្ហា គឺគាត់នឹងមកទទួលសេវា។ ប៉ុន្តែអ្វីដែលអាចផ្លាស់ប្តូរបានឱ្យកាន់តែប្រសើរនោះ គឺយើងធ្វើយ៉ាងណារកយុទ្ធសាស្រ្តយ៉ាងណា ដើម្បីឱ្យប្រជាពលរដ្ឋ ឬសហគមន៍បានដឹងអំពីសម្ពាធឈាមរបស់គាត់ ដឹងពីកម្រិតជាតិស្កររបស់ពួកគាត់ ហើយយើងធ្វើយ៉ាងដូចម្តេចឱ្យសហគមន៍របស់ប្រជាពលរដ្ឋ អាចរក្សានូវសុខភាពរបស់ពួកគាត់ រក្សានូវបញ្ហាដែលគាត់មាននេះ ឱ្យនៅទាប ដើម្បីឱ្យមានសុខភាពល្អ។
លោកបានបន្តថា៖ ក្នុងនោះអ្វីដេលយើងធ្វើការសិក្សាពីបទពិសោធជុំវិញសកលលោក រួមទាំងប្រទេសជាសមាជិកដែលយើងធ្វើការជាមួយនោះ គឺដើម្បីសុខភាព ឬសេវាសុខភាពកាន់តែប្រសើរ គឺត្រូវផ្តោតលើការដែលយើងហៅថា តម្រូវការចាំបាច់ និងតម្រូវការពិតប្រាកដរបស់ប្រជាពលរដ្ឋនៅក្នុងសហគមន៍។ ជាពិសេសពីអតីតកាលយើងបានរៀនសូត្រ និងចែករំលែកបទពិសោធជាច្រើនពីប្រទេសកម្ពុជាផ្ទាល់ ហើយប្រទេសកម្ពុជាបានប្រើប្រាស់បទពិសោធជាម៉ូដែល សម្រាប់ប្រទេស និងសម្រាប់ថែរក្សាសុខភាពបឋមនេះ។ បទពិសោធប្រទេសកម្ពុជា ប្រទេសដទៃទៀត កាលនោះបានចែករំលែកឱ្យប្រទេសដទៃផងដែរបានទុកជាម៉ូដែល។
ជាមួយនោះលោក អ៊ុន ចាន់ដា ជាអភិបាលខេត្តកំពង់ចាមបានមានប្រសាសន៍តបថា៖ សូមអរគុណនូវគំនិតលើកឡើងជាគន្លឹះល្អៗ និងថ្មីៗ របស់លោក TAKESHI KASAI នាយកប្រចាំតំបន់ប៉ាំស៊ីហ្វិក ខាងលិច នៃអង្គការសុខភាពពិភពលោក ដល់រដ្ឋបាលខេត្តកំពង់ចាម។ ចំពោះបញ្ហាជំងឺមិនឆ្លងដែលធ្វើឱ្យប៉ះពាស់ដល់ប្រជាពលរដ្ឋ គឺត្រូវរួមគ្នាដាក់ចេញជាទស្សនវិស័យឯកភាពគ្នា ដើម្បីការពារទុកជាមុន។
លោកអភិបាលខេត្តកំពង់ចាមបានមានប្រសាសន៍ថា៖ ធ្វើដូចម្តេចពេលឈឺ មុននឹងឈឺ ដូរទម្លាប់មុនមកពេទ្យ មានការយល់ដឹងនេះដើម្បីរក្សាធនធានគឺយើងមិនចាំបាច់ឈឺមកពេទ្យ ព្រោះកាលណាឈឺហើយមកពេទ្យត្រូវចំណាយទាំងធនធាន ថវិកា ពេលវេលាធ្វើឱ្យប៉ះពាល់ដល់ជីវភាពគ្រួសារ តែបើរក្សាសុខភាពបានល្អ មិនមានជំងឺ ជាការចូលរួមសន្សំសំចៃថវិកា ជាផ្នែកមួយកាត់បន្ថយភាពក្រីក្រក្នុងគ្រួសារ គឺលោកនឹងធ្វើជូនបញ្ហានេះដល់ប្រជាពលរដ្ឋក្នុងសហគមន៍៕ ដោយ៖ គង់ហេង
